Ovidio, Met., Libro II, vv. 553-564.

“Nam tempore quodam

Pallas Ericthonium, prolem sine matre creatam,

clauserat Actaeo texta de vimine cista

virginibusque tribus gemino de Cecrope natis

et legem dederat, sua ne secreta viderent.

abdita fronde levi densa speculabar ab ulmo,

quid facerent: commissa duae sine fraude tuentur,

Pandrosos atque Herse; timidas vocat una sorores

Aglauros nodosque manu diducit, et intus

infantemque vident adporrectumque draconem.

acta deae refero. pro quo mihi gratia talis

redditur, ut dicar tutela pulsa Minervae

et ponar post noctis avem!”