Ovidio, Met., Libro II, vv. 600-610.

“Laurea delapsa est audito crimine amantis,

et pariter vultusque deo plectrumque colorque

excidit, utque animus tumida fervebat ab ira,

arma adsueta capit flexumque a cornibus arcum

tendit et illa suo totiens cum pectore iuncta

indevitato traiecit pectora telo.

icta dedit gemitum tractoque a corpore ferro

candida puniceo perfudit membra cruore

et dixit: ‘potui poenas tibi, Phoebe, dedisse,

sed peperisse prius; duo nunc moriemur in una.’

hactenus, et pariter vitam cum sanguine fudit;

corpus inane animae frigus letale secutum est.”